భూమాతపై పద్యములు

తే.గీ.
సస్యమనుపేర యేతల్లి స్తన్య మిచ్చు?
నడుగకనె సంపదల నిచ్చు యమ్మ యెవరు?
ఓరిమికి జనని యెవరు  మారుపేరు ?
కొలుతునా మాత భూదేవి కూర్మి మీర!!

కం.
పుట్టగ పెరుగగ బ్రతుకగ
గిట్టగ నీ వొడిని జేసి క్రీడా స్థలిగా
కట్టడి మీఱుచు, నీగతి
పట్టని నీ సుతుల నేల పాలించెదవో!

తే.గీ.
సవతి శ్రీదేవి తాను చంచల యగుటను
నీవె యుండుటచేతను నిశ్చలముగ
అవతరించెను నీనాధు డన్నిమార్లు
పుడమి, నీపైని ప్రేమతో, పుణ్య చరిత!