కందము .
అరి నికరము చెదరగ ప్రభు/
డురికెను రణమున తఱిగని యురిమి యురవడిన్!
గిరగిర తిరిగెడి-కరమున /
బిరబిరమని కరి యరిగెను భిదురము పగిదిన్!
మొదట వ్రాసినది:
అరి వర్గము చెండగ ప్రభు/
డురికెను రణరంగమందు నురుముచు; పరుగున్/
గిరగిర త్రిప్పుచు తొండము/
బిరబిరమని కరి యరిగెను భీకరలీలన్!
కం.
చక్రము త్రిప్పెడు చక్రికి,
చక్రములో నుండి తిరుగు చక్రికి తోడై/
చక్రము సైతము తానై/
సక్రమ మార్గమును జూపు చక్రికి ప్రణతుల్!
-- రాధేశ్యామ్ రుద్రావఝల
🙏🙏🙏
'సిరిసిరిమువ్వా' మకుటంతో శ్రీశ్రీ వ్రాసిన పద్యాలలో చాలా పద్యాలు మనల్ని విడవకుండా పట్టుకుంటాయి. వాటిల్లో ఒకటి ఇది:
కందము.
ఉగ్గేల త్రాగుబోతుకు/
ముగ్గేలా తాజుమహలు మునివాకిటిలో/
విగ్గేల క్రిష్ణశాస్త్రికి/
సిగ్గేలా భావకవికి సిరిసిరిమువ్వా!
******************
పై పద్యానికి నా పేరడీ:
కందము.
పక్కేలా సుఖనిద్రకు/
వక్కేలా పండ్లులేని వారికి కిళ్ళీన్/
నిక్కేలా బక్కకు, టా/
నిక్కేలా బలునకు భువి నిక్కము కాదా..!
- రాధేశ్యామ్ రుద్రావఝల
కందము.
రగిలెను శ్రీమతి పతిపై/
వగచుచు "గుర్తేది మీకు పనిలో పడ మా/
యగచాట్లేవో" యనె! నిల
మగబుద్ధికి మార్పురాక మనుగడయెట్లో!?
ఇంకొకటి:-
కందము:
పగవాడు కాకపోయిన
వగ పాలౌనటుల జేయు వనితల ధరలో
తెగడుచు సాధింపగ నీ
మగబుద్ధికి మార్పురాక మనుగడ యెట్లో!
- రాధేశ్యామ్ రుద్రావఝల
(15.07.2018)
ఆకాశవాణి విశాఖపట్నం వారిచ్చిన సమస్యకు నాపూరణ ఇది..!
ఒక మిత్రుడు పంపిన దత్తపది - సలసల, జలజల, మిలమిల, వెలవెల
చూసిన వెంటనే సరదాగా ఇలా పూరించాను.
కం.
సలసల మను గ్రీష్మమునను/
జలజల మని పాఱు ఝరిని జలకములాడన్/
మిల మిల లాడును మేనియు/
వెలవెల బోవంగ నెండ వేడిమి యంతన్!
దానిలో కవిత్వం, భావుకత ఎక్కడున్నాయి..!? అందుకని మళ్ళీ ఇలా పూరించాను:
21.12.2020
ఆకాశవాణి హైదరాబాదు వారిచ్చిన సమస్య:
కొట్టెడు పతి నిష్టపడరె కోమలులెల్లన్
నా పూరణ:
కం.
తిట్టక, నెన్నడు బాధలు/
పెట్టక, యనురాగ మెపుడు విరియుచు, వెన్నున్/
తట్టుచు తన కలతను పో/
గొట్టెడు పతి నిష్టపడరె కోమలులెల్లన్!
- రాధేశ్యామ్ రుద్రావఝల
సమస్యా పూరణం:
లలనలు సేయఁదగదు వరలక్ష్మీ వ్రతమున్
కం.
విలసద్విభవము కల్గును/
కలిమి యధిష్ఠాత్రి పూజ గరపన్ భక్తిన్!
కలనైనను నిర్లక్ష్యము/
లలనలు సేయఁదగదు, వరలక్ష్మీ వ్రతమున్!!
- రాధేశ్యామ్ రుద్రావఝల, విశాఖపట్నం
నెట్టిల్లు, నట్టిల్లు,మెట్టిల్లు,మట్టిల్లు,
ఈ నాలుగు పదాలూ వాడి పద్యం వ్రాయమని ఒక మిత్రుడు ఇచ్చారు నాకు (దత్తపది)..!!
కం.
నెట్టింట నుండ వలయును,
నట్టింటను మూలగదికి నడవాలోనన్..!
మెట్టింట సిగ్నలుండగ
మట్టిల్లును స్వర్గమౌను మాకది చాలున్!
నెట్ ఉండాలి,
నట్టింట్లోకీ, మూల గదిలోకీ వరండాలోకీ సిగ్నలున్న మెట్టిల్లు అది మట్టిల్లైనా మాకు స్వర్గము, అదిచాలు..! అంటోంది ఒక పెళ్ళి కావలసిన ఈ తరం అమ్మాయి..!!
అత్తారింటికి ఉండవలసిన ఏకైక క్వాలిఫికేషన్ నెట్ ఉండడం.. సిగ్నల్ బాగా రావడం ట..!!😃
- రాధేశ్యామ్ రుద్రావఝల
కం.
నెట్టింట లేనియెడలను
నట్టింటను రచ్చ చేసి నరకము సేయన్
మెట్టిల్లనుచును తలపక
మట్టిల్లుగ మార్చబోకు మన స్వర్గమికన్..!
నెట్ లేదని అలిగిన భార్యని భర్త అనునయిస్తున్నట్టు..!!
