సమస్య: జారులజూచి వందనము సల్పిరి భక్తులు ముక్తి పొందగన్!

సమస్య:
జారులజూచి వందనము సల్పిరి భక్తులు ముక్తి పొందగన్!

ఉత్పలమాల:

శ్రీ రమణీయమూర్తియగు శ్రీపతి రూపము చూడగోరుచున్/
బారులు తీరు భక్తులకు వారధులై కడు పూజ్యభావమున్/
వారక కర్ణ పేయముగ పాశురగానము చేయుచున్న పూ/
జారులజూచి వందనము సల్పిరి భక్తులు ముక్తి పొందగన్!

సమస్యా పూరణము: అమ్మలు మువ్వురున్ కలిసిరమ్మహనీయుడు ఘంటమూనగన్!

సమస్య: 
అమ్మలు మువ్వురున్ కలిసిరమ్మహనీయుడు ఘంటమూనగన్!

నా ప్రయత్నం: 

ఉత్పలమాల:
"అమ్మలగన్న యమ్మ" యని యా ముగురమ్మల వేల్పుఁ, జాల పె/
ద్దమ్మను తా మదిన్ దలచి యా కవి పోతన  వ్రాయబూనె, కా/
వ్యమ్ముగ  విష్ణుగాథలను భాగవతంబు తెనుంగు జేయ, నా/
యమ్మలు మువ్వురున్ కలిసిరమ్మహనీయుడు ఘంటమూనగన్!

- రాధేశ్యామ్ రుద్రావఝల 

సమస్య: చూచిననొక్కటౌను మరి చూడనిచో మరొక్కటగు

సమస్య: చూచిన నొక్కటౌను మరి చూడని చో మరొక్కటగు!
అష్టావధానము వేదిక: వై వి యెస్ మూర్తి ఆడిటోరియమ్, ఆంధ్రాయూనివర్సిటీ
అవధాని: శ్రీ తాతా సత్యసందీప్ శర్మ
పృచ్ఛకులు: శ్రీ భైరవభట్ల విజయాదిత్య గారు

అవధాని గారి పూరణ:
మధ్యాక్కఱ.
కాచుచు విశ్వమంతటిని గాంచదె యంబిక సతము/
ప్రోచవె యామె దృక్కులవి పూర్ణముగా ప్రజనిలను/
యోచన చేసి చూడ సమయోచిత రీతిని యామె/
చూచిన నొక్కటౌను మరి చూడని చో మరొక్కటగు!

నా పూరణ:
మధ్యాక్కఱ.
చూచితి నప్పరావనెడు షోకుల బాల్య మిత్రు, నట/
దోచిన నాదు వస్తువుల తోడ ఖుషీల చేయగను!
వేచితి కన్నుదాట, మరి వేడుక కైన వాఁడు నను/
చూచిన నొక్కటౌను మరి చూడనిచో మరొక్కటగు!

మగబుద్ధికి మార్పురాక మనుగడ యెట్లో! -2

కందము.

ప్రక్కనె యుండగ తాళము/

లెక్కడ పోయినవని తెగ యెగిరెగిరి పడే/

తిక్కల పెనిమిటితో నెక/

సెక్కము లాడుట యదొక్క శ్రీమతికె తగున్! 😀

జగమంతయు వెదకితి మరి/ 

యగుపడ లేదంచు, నాలి నడుగుట పతిదే/

వుగ నా హక్కని తలచెడు/

మగబుద్ధికి మార్పురాక మనుగడ యెట్లో! 🤷🏻‍♀️

- రాధేశ్యామ్ రుద్రావఝల

15.04.2021