ఉ.
పూవుల నాశ్రయించు పలు పుర్వుల, చీమల, తేటి గుంపులన్/
పో విదిలింపగా మనసు పుట్టదు, త్రుంచగ నీదు పూజకై -
జీవుల కాస్పదంబులగు చిన్న సుమాలవి యేలనయ్య? స్వా/
మీ! విరిసేవ సల్పెదను హృత్కమలంబిడి పార్వతీపతీ!
రాధేశ్యామ్ రుద్రావఝల
30.06.2025
ఉత్పలమాల లేబుల్తో ఉన్న పోస్ట్లను చూపుతోంది. అన్ని పోస్ట్లు చూపించు
ఉత్పలమాల లేబుల్తో ఉన్న పోస్ట్లను చూపుతోంది. అన్ని పోస్ట్లు చూపించు
30, జూన్ 2025, సోమవారం
21, జనవరి 2025, మంగళవారం
చిత్రకారుడు
ఉత్పలమాల.
ఎవ్వరు నేర్పె కొమ్మలకు నిన్ని సుమంబులు రెమ్మరెమ్మకున్/
నవ్వుచు పూయగా ప్రతి దినంబు క్రమంబును తప్పకుండగా/
దివ్వెగ భాను బింబము ద్యుతిన్ విరజిమ్మక మున్నె వర్ణములు/
నివ్వటిలంగ జేయగను నెమ్మి వహించుచుఁ నద్దె నాతడే!
ఎవరు కొమ్మకొమ్మలకూ పూవులను క్రమంతప్పకుండా పూయడం నేర్పాడో, ఆతడే ఆ పూవులు అతిశయించేటట్టుగా ఓపికగా సూర్యోదయానికి ముందే వర్ణాలు కూడా అద్దాడు.
14, ఆగస్టు 2024, బుధవారం
స్త్రీమూర్తి
ఉత్పలమాల - సప్తపాది:
పాపగ తల్లిదండ్రులకు భాగ్యమొసంగెడు లక్ష్మి యంశ వై/
ప్రాపుగనుండి నీడవయి భర్తకు, పాపకు నీవెయమ్మవై/
యాపయి నత్త మామ లెడ నాదృతిసూపెడు నాడుబిడ్డవై/
రేపవలున్ కుటుంబమున ప్రేరణ నింపెడు పెద్ద దిక్కువై/
దీపమవై గృహంబునకు, తీరుగ నొక్కతె విన్ని నేర్పులన్/
చూపగ సాధ్యమౌనని యశోవతివై ప్రజ మేలనంగ - నిం/
తీ! పలు బాధ్యతల్ నెరపు దేవత వీవని ప్రస్తుతించెదన్!
రాధేశ్యామ్ రుద్రావఝల
27.07.2024
25, మార్చి 2024, సోమవారం
సమస్య: జారులజూచి వందనము సల్పిరి భక్తులు ముక్తి పొందగన్!
సమస్య:
జారులజూచి వందనము సల్పిరి భక్తులు ముక్తి పొందగన్!
ఉత్పలమాల:
శ్రీ రమణీయమూర్తియగు శ్రీపతి రూపము చూడగోరుచున్/
బారులు తీరు భక్తులకు వారధులై కడు పూజ్యభావమున్/
వారక కర్ణ పేయముగ పాశురగానము చేయుచున్న పూ/
జారులజూచి వందనము సల్పిరి భక్తులు ముక్తి పొందగన్!
24, అక్టోబర్ 2023, మంగళవారం
సమస్యా పూరణము: అమ్మలు మువ్వురున్ కలిసిరమ్మహనీయుడు ఘంటమూనగన్!
సమస్య:
అమ్మలు మువ్వురున్ కలిసిరమ్మహనీయుడు ఘంటమూనగన్!
నా ప్రయత్నం:
ఉత్పలమాల:
"అమ్మలగన్న యమ్మ" యని యా ముగురమ్మల వేల్పుఁ, జాల పె/
ద్దమ్మను తా మదిన్ దలచి యా కవి పోతన వ్రాయబూనె, కా/
వ్యమ్ముగ విష్ణుగాథలను భాగవతంబు తెనుంగు జేయ, నా/
యమ్మలు మువ్వురున్ కలిసిరమ్మహనీయుడు ఘంటమూనగన్!
- రాధేశ్యామ్ రుద్రావఝల
1, జులై 2023, శనివారం
ఇళయరాజా
ఉత్పలమాల.
ఎన్నగ వేలపాటలకు నింతటి గొప్పస్వరమ్ము లల్లి, తీ/
పన్ననిదే యనన్ మదికి నబ్బురమౌ పలు చిత్ర గీతముల్/
మన్ననపొందగా శ్రవణ మాధురి నందుచు నిల్చె గాన ధా/
రన్నవ రాగమై యిళయరాజ ను పేరిట సుస్థిరమ్ముగన్!
నా అభిమాన సంగీత దర్శకుడు శ్రీ ఇళయరాజా గారి పుట్టినరోజు సందర్భంగా 2 June 2023 న వ్రాసిన పద్యం..! నెల ఆలస్యంగా పోస్టు చేస్తున్నాను.
దీనికి సబ్స్క్రయిబ్ చేయి:
పోస్ట్లు (Atom)