ఇంకో పేరడీ పద్యం..!

తన భార్య ఆన్‍లైన్ షాపింగ్ లో మోసపోతుందేమో అని హెచ్చరిస్తున్నాడు భర్త..!!

శార్దూలము:

నీకున్ షాపుల కేగగాను కఱవా నీచేత కార్డుండగా/
బైకుల్, కారులు త్రొక్కుచుండి తిరుగన్ వైడెస్టు రోడ్లుండగా/
సోకుల్ పోవుచు ’నాను లైను’ సరకుల్ చూడన్ విచిత్రమ్ముగా/
వీకన్ జేకొన నీ మొబైలు తగునా!? వెఱ్ఱౌటకా శ్రీమతీ!?

🙂🙃🙂

పై పేరడీకి మూలం (ధూర్జటి విరచిత శ్రీకాళహస్తీశ్వర శతకము నుండి)

నీకున్ మాంసము వాంఛయేని కఱవా? నీ చేత లేడుండగా
జోకైనట్టి కుఠారముండ ననలజ్యోతుండ, నీరుండగా
పాకంబొప్ప ఘటించి చేతి పునుకన్ భక్షింప కా బోయచే
జేకొంటెంగిలి మాంసమిట్లు దగునా! శ్రీకాళహస్తీశ్వరా!

దానికా శ్రీమతి ఇలా అంది:

ఆ.వె.
పైకిపోవగాను నాకును మనసేను!
పైకి పోదు నన్న భయముతోను/
కాలు కదుపలేక, కరొనా కు జడిసి నే/
నాశ్రయించితి మరి 'ఆను లైను'!

- రాధేశ్యామ్ రుద్రావఝల

శ్రీశ్రీ పద్యానికి పేరడీ..!

'సిరిసిరిమువ్వా' మకుటంతో శ్రీశ్రీ వ్రాసిన పద్యాలలో చాలా పద్యాలు మనల్ని విడవకుండా పట్టుకుంటాయి. వాటిల్లో ఒకటి ఇది: 

కందము.
ఉగ్గేల త్రాగుబోతుకు/
ముగ్గేలా తాజుమహలు మునివాకిటిలో/
విగ్గేల క్రిష్ణశాస్త్రికి/
సిగ్గేలా భావకవికి సిరిసిరిమువ్వా!

******************

పై పద్యానికి నా పేరడీ:

కందము.
పక్కేలా సుఖనిద్రకు/
వక్కేలా పండ్లులేని వారికి కిళ్ళీన్/
నిక్కేలా బక్కకు, టా/
నిక్కేలా బలునకు భువి నిక్కము కాదా..!

- రాధేశ్యామ్ రుద్రావఝల