సమస్య:
జారులజూచి వందనము సల్పిరి భక్తులు ముక్తి పొందగన్!
ఉత్పలమాల:
శ్రీ రమణీయమూర్తియగు శ్రీపతి రూపము చూడగోరుచున్/
బారులు తీరు భక్తులకు వారధులై కడు పూజ్యభావమున్/
వారక కర్ణ పేయముగ పాశురగానము చేయుచున్న పూ/
జారులజూచి వందనము సల్పిరి భక్తులు ముక్తి పొందగన్!
సమస్యా పూరణము లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
సమస్యా పూరణము లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
25, మార్చి 2024, సోమవారం
సమస్య: జారులజూచి వందనము సల్పిరి భక్తులు ముక్తి పొందగన్!
29, ఏప్రిల్ 2022, శుక్రవారం
నీవును నీవునున్ మరియు నీవును నీవును నీవు నీవునున్! - సమస్యాపూరణము
నీవును నీవునున్ మరియు నీవును నీవును నీవు నీవునున్!
పై సమస్యకు నా పూరణ:
అభిమన్యుడు నిహతుడై యుండుట చూచి అర్జునుడు విలపిస్తూ కృష్ణ ధృష్టద్యుమ్నులతోనూ తన సోదరులు నలుగురితోనూ ఇలా అంటున్నాడు:
ఉత్పలమాల:
వావి తలంచరైరి చిఱు ప్రాయము వాఁడని యెంచకే, సుభ/
ద్రా వనితాసుతున్ సమర రంగము నందున చంపె హంత లా/
కావరమెల్ల చెండెద! కకావికలౌదురు గాక చూడరే/
నీవును నీవునున్ మరియు నీవును నీవును నీవు నీవునున్!
చచ్చిపడిఉన్న తన ప్రియసుతుని చూచి అర్జునుని దుఃఖిస్తూ ఇందరు యోధులున్నారు నా కొడుకును ఒక్కరైనా రక్షించలేకపోయారా అంటే ధర్మరాజు, మిగతా ముగ్గురు సోదరులూ ధృష్టద్యుమ్నుడూ ఆ జయధ్రథుడు అడ్డుపడ్డాడు, అందువల్ల మేమేమీ చేయలేకపొయామన్నారు.
కృష్ణునితో నువ్వుకూడా ఇది నివారించ లేకపోయావా? నీకు స్వయానా మేనల్లుడే, నువ్వు తలుచుకుంటే సాధ్యం కాకపోయేదా అని నిష్ఠురాలు ఆడాడు.
తాను దగ్గర ఉంటే తన కొడుక్కి ఈ దుర్మరణం సంభవించేది కాదని తలుస్తూ ఆ హంతకులనందరి కావరాన్ని దునుమాడి కకావికలు చేయడం నువ్వు చూస్తావు, నువ్వు చూస్తావు.. అని ఆరుసార్లు అన్నాడు ఆరుగురివైపు చూస్తూ..!!
అంటే నా పరాక్రమాన్ని చూసి నేర్చుకోండి అన్నట్టు అన్నమాట..! అలా ఆరు సార్లు అనడంలో ధర్మరాజు, మిగతా ముగ్గురు సోదరులూ, కృష్ణుడూ, ధృష్టద్యుమ్నుల (మొత్తం ఆరుగురు) పట్ల ఒక తిరస్కారం, తూష్ణీభావం కనిపించేలాగా చూపవచ్చునన్న ఉద్దేశ్యంతో పూరణకు ఈఘట్టాన్ని ఎంచుకున్నాను.
మీ అభిప్రాయాలకై ఎదురుచూస్తూ..!
- రాధేశ్యామ్ రుద్రావఝల
16, ఏప్రిల్ 2021, శుక్రవారం
మగబుద్ధికి మార్పురాక మనుగడ యెట్లో! - 1
కందము.
రగిలెను శ్రీమతి పతిపై/
వగచుచు "గుర్తేది మీకు పనిలో పడ మా/
యగచాట్లేవో" యనె! నిల
మగబుద్ధికి మార్పురాక మనుగడయెట్లో!?
ఇంకొకటి:-
కందము:
పగవాడు కాకపోయిన
వగ పాలౌనటుల జేయు వనితల ధరలో
తెగడుచు సాధింపగ నీ
మగబుద్ధికి మార్పురాక మనుగడ యెట్లో!
- రాధేశ్యామ్ రుద్రావఝల
(15.07.2018)
ఆకాశవాణి విశాఖపట్నం వారిచ్చిన సమస్యకు నాపూరణ ఇది..!
16, ఆగస్టు 2019, శుక్రవారం
మతమును మించి మానవత, మంచిని పెంచుటె మేలనందగున్!
ఆకాశవాణి గత పక్షపు సమస్య:
మతమును మించి మానవత, మంచిని పెంచుటె మేలనందగున్!
నాపూరణ:
చంపకమాల:
సతతము పచ్చశోభలకు స్థావరమౌ మళయాళ భూమినిన్/
వెతలను ముంచె నయ్యొ పృథివీపతియే తన సొంత దేశమున్/
హతవిధి! నా ప్రజల్ తమ సహార్తుల కాచిరి యైకమత్యమున్ !
మతమును మించి మానవత, మంచిని పెంచుటె మేలనందగున్!
(10.09.2018)
వెలదికన్న నాట వెలది మేలు!
సమస్య:
వెలదికన్న నాట వెలది మేలు!
ఆ.వె.
రసికుడౌహితుడు సరసములాడుచు కవీ!
వెలదికన్న నాట వెలది మేలు/
గాదె యనగ విన్న కవిగారి యిల్లాలు/
కస్సుమనగ కవియు నుస్సురనెను!
ఇంకొకలా
ఆ.వె.
రసికుడౌహితుడు సరసములాడుచు కవీ!
వెలదికన్న నాట వెలది మేలు
గాదె యనగ పలికె "కాదులే మా యింటి/
వెలదిమెచ్చు నాటవెలది మేలు..!"
జారులజూచి వందనము సల్పిరి భక్తులు ముక్తి పొందగన్!
సమస్య:
జారులజూచి వందనము సల్పిరి భక్తులు ముక్తి పొందగన్!
ఉత్పలమాల:
తీరగు శ్రీపతిన్ తనివి దీరగ దర్శనభాగ్యమందగన్
బారులు తీరు భక్తులకు వారథులై కడు పూజ్యభావమున్
వారక కర్ణ పేయముగ పాశురగానము చేయుచున్న పూ
జారులజూచి వందనము సల్పిరి భక్తులు ముక్తి పొందగన్!
కొట్టెడు పతి నిష్టపడరె కోమలులెల్లన్
ఆకాశవాణి హైదరాబాదు వారిచ్చిన సమస్య:
కొట్టెడు పతి నిష్టపడరె కోమలులెల్లన్
నా పూరణ:
కం.
తిట్టక, నెన్నడు బాధలు/
పెట్టక, యనురాగ మెపుడు విరియుచు, వెన్నున్/
తట్టుచు తన కలతను పో/
గొట్టెడు పతి నిష్టపడరె కోమలులెల్లన్!
- రాధేశ్యామ్ రుద్రావఝల
లలనలు సేయఁదగదు వరలక్ష్మీ వ్రతమున్
సమస్యా పూరణం:
లలనలు సేయఁదగదు వరలక్ష్మీ వ్రతమున్
కం.
విలసద్విభవము కల్గును/
కలిమి యధిష్ఠాత్రి పూజ గరపన్ భక్తిన్!
కలనైనను నిర్లక్ష్యము/
లలనలు సేయఁదగదు, వరలక్ష్మీ వ్రతమున్!!
- రాధేశ్యామ్ రుద్రావఝల, విశాఖపట్నం
12, జూన్ 2018, మంగళవారం
ధనములేనివాడె ధన్యజీవి
ఆ.వె.
లేదు లేద నొకడు రేయి పవలుడిగి/
ధనము చేత బడగ స్థలము కొనెను/
కర్మ చాలక నది కబ్జాకు గురియాయె!
ధనము లేనివాడె ధన్య జీవి..!
11.06.2018
ఆ.వె.
క్రోధమదియెనిప్పు కుంపటి వంటిదౌ
కారుచిచ్చు వోలె కాల్చు మనసు/
క్రోధమతికి జగతి కూరిమి కరవు, క్రో
ధనము లేనివాడె ధన్యజీవి/
ఆ.వె.
ధనము చేతగాని పని మానవత్వము/
సాధ్య పరచు నదియె చక్కగాను/
మానవతయె లేని మనిషికన్నను పాడు/
ధనము లేనివాడు ధన్య జీవి..!
- రాధేశ్యామ్ రుద్రావఝల
12.06.2018
దీనికి సబ్‌స్క్రయిబ్ చేయి:
పోస్ట్‌లు (Atom)