చిత్త శుద్ధి

ఆ. వె.

మురికి యున్న గదిని చొరలేము మన, మిక 

చెడిన మదిని యెట్లు చేరు హరుడు?

చిత్తశుద్ధి కలిగి సేవింప, నాతడు

హృదయకమలమందు కుదురుకొనును!

- రాధేశ్యామ్ రుద్రావఝల

25.09.2025

అష్టవిధ పుష్పార్చన

శ్లో.

అహింసా ప్రథమం పుష్పం

పుష్పమింద్రియ నిగ్రహం

సర్వభూతదయా పుష్పం

క్షమా పుష్పం విశేషతః

శాంతి పుష్పం తపః పుష్పం

ధ్యాన పుష్పం తథైవ చ

సత్యమష్టవిధం పుష్పం

శంభోః ప్రీతికరం భవేత్

నా అనువాద ప్రయత్నము:

తే. గీ.

ఎరుగగ ప్రథమ పుష్పమహింస, యింద్రి

యమ్ము లణచుట, భూత దయయును, క్షమము

శాంతియు, తపము ధ్యానము, సత్యములను

నష్ట విధ పుష్పయుతమౌ సమర్చనమ్ము

శంభునికి ప్రీతికరమగు సరణి యిదియ!

********

నాల్గవ పాదానికి మా శ్రీరామారావు మాస్టారి సవరణ:

అష్టవిధ కుసుమార్చన - శిష్ట‌మరయ

శంభునికి ప్రీతికరమగు సరణి యిదియ!

రాధేశ్యామ్ రుద్రావఝల

15.07.2025

🙏

పోయిన వారం మిత్రులు రాధేశ్యామ్ గారు అనువాద మందించిన మూలశ్లోకమునకు నా యనువాద యత్నము.

ఎడిట్:

మా మిత్రులు శ్రీ సాహితీ సామ్రాజ్యం గారి అనువాదం:

హింస చేయకునికి నెన్నగ తొలిపుష్ప;

మింద్రియముల నిగ్రహించు టొకటి;

భూతదయయు నొక్క పుష్పమనగ నొప్పు;

క్షమము మరియు నొక్క సుమము గనగ;

శాంతి తపము లరయ చక్కని కుసుమముల్; 

ధ్యాన మరయ నొక్క యలరు జూడ;

సూనృతమ్ము నొక్క సూన; మీ యెనిమిది 

/యలరు లంది యలరు నష్టమూర్తి.

మాస్టారుకు ధన్యవాదములతో.....

🙏

విరిసేవ

ఉ.

పూవుల నాశ్రయించు పలు పుర్వుల, చీమల, తేటి గుంపులన్/

పో విదిలింపగా మనసు పుట్టదు, త్రుంచగ నీదు పూజకై -

జీవుల కాస్పదంబులగు చిన్న సుమాలవి యేలనయ్య? స్వా/

మీ! విరిసేవ సల్పెదను హృత్కమలంబిడి పార్వతీపతీ!

రాధేశ్యామ్ రుద్రావఝల 

30.06.2025

చిత్రకారుడు

 

 

ఉత్పలమాల.

ఎవ్వరు నేర్పె కొమ్మలకు నిన్ని సుమంబులు రెమ్మరెమ్మకున్/
నవ్వుచు పూయగా ప్రతి దినంబు క్రమంబును తప్పకుండగా/
దివ్వెగ భాను బింబము ద్యుతిన్ విరజిమ్మక మున్నె వర్ణములు/
నివ్వటిలంగ జేయగను నెమ్మి వహించుచుఁ నద్దె నాతడే!

ఎవరు కొమ్మకొమ్మలకూ పూవులను క్రమంతప్పకుండా పూయడం నేర్పాడో, ఆతడే ఆ పూవులు అతిశయించేటట్టుగా ఓపికగా సూర్యోదయానికి ముందే వర్ణాలు కూడా అద్దాడు.

నూతన సంవత్సర శుభాకాంక్షలతో వ్రాసిన పద్యం

ఆ.వె.

నిరుడు గడచిపోయె, నిర్గమించె గతము/

చింతలన్ని వీడి సంతసమున/

క్రొత్త వత్సరమున క్రొంగ్రొత్త యాశల/

స్వాగతించుమింక భవ్య భవిత! 

*నూతన సంవత్సర శుభాకాంక్షలతో..*

 

- రాధేశ్యామ్ రుద్రావఝల, మాధవి, కృష్ణప్రియ, కృష్ణ ప్రీతమ్

అయోధ్యా రాముడు

చంపకమాల.

దినమణి వంశ దీపకుఁడు, తీరుగ ముద్దులు మూటగట్టుచున్/
కనకపు చేలఁ గట్టి, కరకంకణముల్, మణిహారపంక్తులన్/
తనరుచు, చాపబాణముల దాలిచి, స్వర్ణ కిరీట ధారియై/
ఘనమగు గద్దెపై నిలిచి కాంతుల చిందెను బాలరాముడై!
ప్రణతుల, మేన పుల్కల శుభమ్ముల కోరుచు నా యయోధ్య రా/
ముని కనులార గాంచితిమి మోదము, భాగ్యము నంది ధన్యతన్!

-- రాధేశ్యామ్ రుద్రావఝల

20.12.2024

ఈ నెల 13వ తేదీన అయోధ్య రాముణ్ణి దర్శించుకున్నాం.

🙏🙏🙏

దీపావళి పద్యాలు

మీకు, మీ కుటుంబ సభ్యులకు దీపావళి శుభాకాంక్షలతో:

 

ఉత్పలమాల.

దివ్వెల బారులన్ గృహము తీరగు వెల్గుల సంతరింపగన్/
పువ్వుల చిచ్చుబుడ్లు, మెరుపుల్ వెదజల్లెడు చక్రశోభలన్/
రవ్వల కాకరొత్తులును రంగు మతాబు, పటాసు, జువ్వలున్/
సవ్వడి సేయుచుండ నిట సంబరముల్ గగనమ్ము నంటెడిన్/

కందము.
నరకుడు చచ్చిన వేళను/
సరగున జన హృదయసీమ సంబరమందెన్!
ధరణిని పేర్చిరి దివ్వెల/
వరుసల దీపావ ళియను పర్వదినముగన్!

కందము.

తాపములను చల్లార్చుచు/
మాపుచు చీకట్ల జనుల మనములయందున్/
దీపమువలె జ్ఞానమ్మిడి
దీపావళి పర్వమవని దీపించు తగన్!

చంపకమాల

పెనగొన నొక్కటై వలపు, వీరరసమ్ములు నిండ కన్నులన్/
తన కరమందు విల్లుగొని దైత్యుని పీచమడంచ నిల్చు స/
త్యను కడగంటఁ జూచె కడు తన్మయుడై ముదమార కృష్ణుడున్/
కొనరగ నామెఁ జూచె నరకుండు రణంబున సంభ్రమంబునన్!

కొనరు= చచ్చు, నీల్గు

-- రాధేశ్యామ్ రుద్రావఝల

శ్రీహరి - వర్ణనము

చంపకమాల:

కరముల శంఖచక్రములు, కాంతిలు పద్మ గదాదులున్, సదా/

యురమున కౌస్తుభమ్ము, సిరియున్ ఘనహారము లద్వితీయమై/

శిరమున నప్రమేయ మణి శింజితమౌ మకుటంబు నొప్పు శ్రీ/

హరిని దలంచి భక్తి మది నాశ్రిత వత్సలు డంచు మ్రొక్కెదన్!

- రాధేశ్యామ్ రుద్రావఝల

16.10.2024

కరి యురవడి..!

 

కందము .
అరి నికరము చెదరగ ప్రభు/
డురికెను రణమున తఱిగని యురిమి యురవడిన్!
గిరగిర తిరిగెడి-కరమున /
బిరబిరమని కరి యరిగెను భిదురము పగిదిన్!

మొదట వ్రాసినది:

అరి వర్గము చెండగ ప్రభు/
డురికెను రణరంగమందు నురుముచు; పరుగున్/
గిరగిర త్రిప్పుచు తొండము/
బిరబిరమని కరి యరిగెను భీకరలీలన్!

శిల్పి

 

 సీ.

నల్ల రాతిని జూచి నారాయణుని రూపు/
దర్శనమును చేయు ద్రష్ట యెవరు ?
గండ శిలల లోన కమనీయ మూర్తిని/
వెలికి తీసినయట్టి వేత్త యెవరు?
ఉలిని తాటించగా హొయలొల్క బండకు/
చలనము కలిగించు సరసు డెవరు?
చూచినంతనె కేలు జోడించు నట్టి ది-
వ్యత రప్ప కొసగిన వరదు డెవరు?
కొండకోనలఁబడి  యెండవానల కోర్చు/
బండల కగు నెవరండ దండ?

తే. గీ.

ఒకటి ప్రాకార శిల్పమౌ, నొకటి గడప,
దేవతామూర్తిగ నొకటి సేవలందు-
శిలల భాగ్యవిధాత యౌ శిల్పి యతడు!
ఆ కళావిశారదునకు నంజలింతు!