21, జనవరి 2025, మంగళవారం

చిత్రకారుడు

 

 

ఉత్పలమాల.

ఎవ్వరు నేర్పె కొమ్మలకు నిన్ని సుమంబులు రెమ్మరెమ్మకున్/
నవ్వుచు పూయగా ప్రతి దినంబు క్రమంబును తప్పకుండగా/
దివ్వెగ భాను బింబము ద్యుతిన్ విరజిమ్మక మున్నె వర్ణములు/
నివ్వటిలంగ జేయగను నెమ్మి వహించుచుఁ నద్దె నాతడే!

ఎవరు కొమ్మకొమ్మలకూ పూవులను క్రమంతప్పకుండా పూయడం నేర్పాడో, ఆతడే ఆ పూవులు అతిశయించేటట్టుగా ఓపికగా సూర్యోదయానికి ముందే వర్ణాలు కూడా అద్దాడు.

6, జనవరి 2025, సోమవారం

నూతన సంవత్సర శుభాకాంక్షలతో వ్రాసిన పద్యం

ఆ.వె.

నిరుడు గడచిపోయె, నిర్గమించె గతము/
చింతలన్ని వీడి సంతసమున/
క్రొత్త వత్సరమున క్రొంగ్రొత్త యాశల/
స్వాగతించుమింక భవ్య భవిత! 

*నూతన సంవత్సర శుభాకాంక్షలతో..*
 
- రాధేశ్యామ్ రుద్రావఝల, మాధవి, కృష్ణప్రియ, కృష్ణ ప్రీతమ్

23, డిసెంబర్ 2024, సోమవారం

అయోధ్యా రాముడు



చంపకమాల.

దినమణి వంశ దీపకుఁడు, తీరుగ ముద్దులు మూటగట్టుచున్/
కనకపు చేలఁ గట్టి, కరకంకణముల్, మణిహారపంక్తులన్/
తనరుచు, చాపబాణముల దాలిచి, స్వర్ణ కిరీట ధారియై/
ఘనమగు గద్దెపై నిలిచి కాంతుల చిందెను బాలరాముడై!
ప్రణతుల, మేన పుల్కల శుభమ్ముల కోరుచు నా
యయోధ్య రా/
ముని కనులార గాంచితిమి మోదము, భాగ్యము నంది ధన్యతన్!

-- రాధేశ్యామ్ రుద్రావఝల

20.12.2024

ఈ నెల 13వ తేదీన అయోధ్య రాముణ్ణి దర్శించుకున్నాం.

🙏🙏🙏

1, నవంబర్ 2024, శుక్రవారం

దీపావళి పద్యాలు

మీకు, మీ కుటుంబ సభ్యులకు దీపావళి శుభాకాంక్షలతో:
 

16, అక్టోబర్ 2024, బుధవారం

శ్రీహరి - వర్ణనము

చంపకమాల:

కరముల శంఖచక్రములు, కాంతిలు పద్మ గదాదులున్, సదా/
యురమున కౌస్తుభమ్ము, సిరియున్ ఘనహారము లద్వితీయమై/
శిరమున నప్రమేయ మణి శింజితమౌ మకుటంబు నొప్పు శ్రీ/
హరిని దలంచి భక్తి మది నాశ్రిత వత్సలు డంచు మ్రొక్కెదన్!

- రాధేశ్యామ్ రుద్రావఝల
16.10.2024

12, సెప్టెంబర్ 2024, గురువారం

కరి యురవడి..!

 

కందము .
అరి నికరము చెదరగ ప్రభు/
డురికెను రణమున తఱిగని యురిమి యురవడిన్!
గిరగిర తిరిగెడి-కరమున /
బిరబిరమని కరి యరిగెను భిదురము పగిదిన్!

మొదట వ్రాసినది:

అరి వర్గము చెండగ ప్రభు/
డురికెను రణరంగమందు నురుముచు; పరుగున్/
గిరగిర త్రిప్పుచు తొండము/
బిరబిరమని కరి యరిగెను భీకరలీలన్!

23, ఆగస్టు 2024, శుక్రవారం

శిల్పి

 

 సీ.

నల్ల రాతిని జూచి నారాయణుని రూపు/
దర్శనమును చేయు ద్రష్ట యెవరు ?
గండ శిలల లోన కమనీయ మూర్తిని/
వెలికి తీసినయట్టి వేత్త యెవరు?
ఉలిని తాటించగా హొయలొల్క బండకు/
చలనము కలిగించు సరసు డెవరు?
చూచినంతనె కేలు జోడించు నట్టి ది-
వ్యత రప్ప కొసగిన వరదు డెవరు?
కొండకోనలఁబడి  యెండవానల కోర్చు/
బండల కగు నెవరండ దండ?

తే. గీ.

ఒకటి ప్రాకార శిల్పమౌ, నొకటి గడప,
దేవతామూర్తిగ నొకటి సేవలందు-
శిలల భాగ్యవిధాత యౌ శిల్పి యతడు!
ఆ కళావిశారదునకు నంజలింతు!

జలకాలాటలలో..


ఆ. వె. 

నీట దిగినయంత నేనుగా తీరమ్ము/ 
చేరబోను తనివి తీరకుండ!  
మేముకూడ నంతె! సామజ రాజమా,
పిలిచి యమ్మ రెండు పెట్టు దాక! 

😄😄😄

- రాధేశ్యామ్ రుద్రావఝల

22, ఆగస్టు 2024, గురువారం

చక్రి..!




కం.
చక్రము త్రిప్పెడు చక్రికి,
చక్రములో నుండి తిరుగు చక్రికి తోడై/
చక్రము సైతము తానై/
సక్రమ మార్గమును జూపు చక్రికి ప్రణతుల్!   

-- రాధేశ్యామ్ రుద్రావఝల 
🙏🙏🙏

14, ఆగస్టు 2024, బుధవారం

స్త్రీమూర్తి


tollywood celebrities tweets on international womens day

ఉత్పలమాల - సప్తపాది:

పాపగ తల్లిదండ్రులకు భాగ్యమొసంగెడు లక్ష్మి యంశ వై/
ప్రాపుగనుండి నీడవయి భర్తకు, పాపకు నీవెయమ్మవై/
యాపయి నత్త మామ లెడ నాదృతిసూపెడు నాడుబిడ్డవై/
రేపవలున్ కుటుంబమున ప్రేరణ నింపెడు పెద్ద దిక్కువై/
దీపమవై గృహంబునకు, తీరుగ నొక్కతె విన్ని నేర్పులన్/
చూపగ సాధ్యమౌనని యశోవతివై ప్రజ మేలనంగ - నిం/
తీ! పలు బాధ్యతల్ నెరపు దేవత వీవని ప్రస్తుతించెదన్!

రాధేశ్యామ్ రుద్రావఝల
27.07.2024

గమనిక

O దయచేసి తెలుగు వ్యాఖ్యలు ఆంగ్ల లిపిలో కాక తెలుగులోనే వ్రాయమని మనవి. ఎందుకంటే తేట తెలుగుని తెలుగులో చదివితేనే అందం..ఆనందం.. కనుక.!!
O వ్యాఖ్యలు అజ్ఞాతముగా కాక మీ అసలు పేరో లేక కలం పేరో వినియోగించగలరు.

ప్రచలిత సమర్పణలు