వినాయకుడు - తండ్రికి తగ్గ తనయుడు

 సీ.
ప్రీతి గలిగి మూడు బిల్వ పత్రము లిడ/
ముదమున నీతండ్రి మోక్షమిచ్చు!
కుడుములనిడి మూడు గుంజీలు తీయుచో/
సుముఖుడ వయ్యెడు సుతుడవీవు!
గరిటెడు గంగతో శిరమును తడుపగ/
మెచ్చి మాపు నతడు మృత్యు భయము!
గరికెల ద్వందమ్ము కరమున నుంచగ/
విడివడ జేతువు విఘ్నచయము!
పాము లాభరణాలు పరమేశ్వరునకునై/
నాగ బంధము నీకు నడ్డికట్టు!
గజచర్మధారిగ, కరివదనునిగాను/
బూది పూయునతడు, బురదనీవు!

ఆ.వె.
అమ్మచేతి నలుగు నాకారమును దాల్చి/
యయ్య గుణము, రూప మనుకరించి/
యమ్మ కొడుకు వగుచు నయ్యపేరు నిలుపు/
భక్త సులభ! సుముఖ! పార్వతిసుత!

- రాధేశ్యామ్ రుద్రావఝల
22.08.2020

ఆ.వె.

మోజదేమొ గాని మోదకప్రియ గడ్డి/
పూలతోడ భక్తి పూజ సేయ,
తేజరిల్లి జనుల దీవింతువో స్వామి/
చవితి రోజు నిన్ను సన్నుతింప!

- రాధేశ్యామ్ రుద్రావఝల