వినాయకుడు - తండ్రికి తగ్గ తనయుడు

 సీ.
ప్రీతి గలిగి మూడు బిల్వ పత్రము లిడ/
ముదమున నీతండ్రి మోక్షమిచ్చు!
కుడుములనిడి మూడు గుంజీలు తీయుచో/
సుముఖుడ వయ్యెడు సుతుడవీవు!
గరిటెడు గంగతో శిరమును తడుపగ/
మెచ్చి మాపు నతడు మృత్యు భయము!
గరికెల ద్వందమ్ము కరమున నుంచగ/
విడివడ జేతువు విఘ్నచయము!
పాము లాభరణాలు పరమేశ్వరునకునై/
నాగ బంధము నీకు నడ్డికట్టు!
గజచర్మధారిగ, కరివదనునిగాను/
బూది పూయునతడు, బురదనీవు!

ఆ.వె.
అమ్మచేతి నలుగు నాకారమును దాల్చి/
యయ్య గుణము, రూప మనుకరించి/
యమ్మ కొడుకు వగుచు నయ్యపేరు నిలుపు/
భక్త సులభ! సుముఖ! పార్వతిసుత!

- రాధేశ్యామ్ రుద్రావఝల
22.08.2020

ఆ.వె.

మోజదేమొ గాని మోదకప్రియ గడ్డి/
పూలతోడ భక్తి పూజ సేయ,
తేజరిల్లి జనుల దీవింతువో స్వామి/
చవితి రోజు నిన్ను సన్నుతింప!

- రాధేశ్యామ్ రుద్రావఝల

వినాయక చవితి

వినాయక చవితి శుభాకాంక్షలతో:

సీసము:
అమ్మ చేత నలుగె యాకారమును దాల్చి/
       ద్వార పాలకునిగ తా తనరుచు/
దారివదలకున్న తండ్రి కినుక పూని/
       తనయు తెలియలేక తలను నరికె/
ఉత్తరమున తలనుంచి నిద్రించెడు/
       హస్తిమస్తకమును అతికి నిన్ను/
మరల జీవితుఁ జేయ మాత ముదమునంది/
          కుడుముల తినిపించె కొసరి కొసరి/
ఆ. వె.
ఘనతలెన్నొ జేసి గణపతిత్వము పొంది/
గజముఖుడనుపేర గణుతికెక్కి/
మోదకముల చాల ముదమార చేకొను/
భక్త సులభ సుముఖ పార్వతిసుత!

తనరుచు: విజృంభించు

- రాధేశ్యామ్ రుద్రావఝల

సీసము (పంచపాది):

పంచలోహపుమూర్తి పనిలేదు పూజింప/
          పసుపు ముద్దయె నీకు పసిడి ప్రతిమ/
ఆకాశపందిళ్ళు నీకు నక్కరలేదు/
          చాలుచాలును చిన్ని పాలవెల్లి/
ఘనలేపనము లేల కస్తూరి యేలను/  
          గరికెపూవులెనీకు కలువపూలు/
పుష్పమాలికలతో పూజింప పనిలేదె/
          ఆకులలముల నీవాదరింప/
నైవేద్యములనిడ నలుబది రకములు/
          మోదకమ్ములె నీకు మురియు విందు/
ఆ. వె.
అల్పమైన పూజ నందుకొని యనల్ప/
కామ్యములను దీర్చు రమ్యమూర్తి!
అమ్మ కొడుకు వగుచు నయ్యపేరు నిలుపు/
భక్త సులభ సుముఖ పార్వతిసుత!⁠⁠⁠⁠

- రాధేశ్యామ్ రుద్రావఝల

ఉత్పలమాల:

జన్మదినంబునన్ కడుపుఁ చాలెడు కుడ్ముల నారగించి యా/
తన్మయతన్ చనన్ గనుచు తానదె చంద్రుడు గేలి సేయగన్ /
చిన్మయ! శాపమిచ్చి తివి, చేరి భజింపగ  శాప పీడనం  /
బున్మర లించితీవ ప్రభు!మోదక హస్త! గణేశ! పాహి మామ్!!

- రాధేశ్యామ్ రుద్రావఝల

కందము:
పన్నగపు జందియంబును
చిన్నెలుకయె వాహనంబు చిత్రము గానన్
వన్నెల మోమది యేనుగు
నన్నియు నీ యభయ ముద్ర నైక్యత మెలగున్!

పాము అంటే ఎలుకకి భయం, ఎలుక అంటే ఏనుగుకు భయం. కాని అన్నీ ఆయన అభయములో కలసి మెలసి ఉంటాయి.
- రాధేశ్యామ్ రుద్రావఝల

కన్నులు చింతాకులునవి
గున్నేనుగు తలయు బొజ్జ గుండ్రంబదియే
నున్నని దంతంబొక్కటె
ఎన్నగ గణపతిని జూడ నెన్నియొ వింతల్ ..!

కన్నులు చింతాకులునవి
గున్నేనుగు తలయు బొజ్జ గుండ్రంబదియే
చిన్నెలుక నెక్కి వచ్చుచు
నున్నాడదిగోగణపతి యొక్కడు కనుడీ

కన్నులు చింతాకులునవి
గున్నేనుగు తలయు బొజ్జ గుండ్రంబదియే
చిన్నెలుక నెక్కి వచ్చుచు
నున్నాడదిగోగణపతి యుండ్రాళ్ళకునై

ఇంకొక్క కందము:

చెన్నుగ వ్రాసితివీవట
పన్నుగ వ్యాసుడు నుడివిన పంచమ వేదం/
బన్నుగ ఘంటము నిలుపక/
విన్నాణపు ఖనివి నీవె విఘ్నేశ నతుల్!

కరోనా కష్టాలు..!

సీసమాలిక.

స్వచ్ఛమౌ చిరు గాలి పలుకరించెనుగాని,

మోముపై ముసుగులు  ముఖ్యమాయె!

చేతుల శుభ్రము చేసికొన్నను గాని,

కరచాలనమునకు కలుగు భయము!

బంధుమిత్రులు తీరుబాటుగా నుండినన్,

కలవలేము భుజము కలుపలేము!

నలభీము తలపించ బులపాటమున్ననూ,

విందుకొకరి నైన పిలువ లేము!

వాహనములు లేక బాటలన్నియు ఖాళి,

హేలగా కారును త్రోల లేము!

పనికి పోవగ రోజు మనసు లాగేను, వా

రాంత సెలవులకు నంతు తెగదు!

ఆ.వె.

ధనము కలుగ నేమి తరుగు మార్గము లేదు!

నిర్ధనుడది పొందు నియతి లేదు!

ఆత్మబంధువైన నాఖరి చూపుకు,

నోచబోము మిగుల నులుసు జెంద!

(నులుసు = న్యూనత)

ఆ.వె.

కాలమాగెను కడు కడగండ్లు పెంచుచు,

పుడమిజనులకెల్ల పుట్టి ముంచ!

(నవకతవక కాగ హాని కలిగె!)

ఇంతఁజేయు పాపి  యంతట నిండియు

కానరాదు నది కరోన క్రిమియె!

- రాధేశ్యామ్ రుద్రావఝల

04.05.2020

కరోనా - స్వీయ గృహనిర్బంధం

కం.
మన ఆత్రమె మన శత్రువు,
మన శుభ్రతె మనకు రక్ష, మడి చుట్టంబౌ!
మన యేకాంతమె స్వర్గము!
మన గృహ నిర్బంధమె మన మతమై యుండన్!

- రాధేశ్యామ్ రుద్రావఝల

అందరూ ఇండ్లలోనే ఉండి కరోనాను తరిమికొట్టండి.

కరోనా.. కరోనా..!!

ఆ.వె.
ప్రాకు, యెగురు, నడచు ప్రాణుల నొదలక/
వేపుడుగను వేడి సూపుగాను/
నాదరవుల జేసి యా చీని దేశాన/
తిని కరోన వ్యాధి తెచ్చికొనిరి..!

కం.
మేడిన్ చైనా సరుకును/
వాడెన్ భూగోళమంత వరెవా యనుచున్!
మేడిన్ చైనా వ్యాధికి/
మూడెన్ ప్రజలకు జగమది మొర్రో యనగన్!

కం.
వెల్లుల్లి మేలు చేయును/
తల్లికిమల్లే, కరోన దరిచేరదనన్,
అల్లమును కలిపి యీతడు/
పుల్లని నిమ్మను బిగించి ముక్కున గట్టెన్! 🤦🏻‍♂🤷🏻‍♂

కం.
ఉండండింట్లో! లేదా,
వుండాలిక నాసుపత్రి నొంటిగ! పైగా,
దండ పడి పటమునుండెడు/
గండము దరిజేరు నింక కరొనా దయతోన్!

- రాధేశ్యామ్ రుద్రావఝల
24.03.2020