మధ్యాక్కఱలో మొదటి ప్రయత్నము

ఇది 'మధ్యాక్కఱ' ఛందస్సులో నా మొదటి ప్రయత్నము:

మధ్యాక్కఱ:

నామనవి వినంగ నీకు నామోషి యాయెనా!? చెలియ,

ప్రేమ పొంగగ నీపయి, మది రేగె నేవో కోర్కె, లింక

కామితార్థము నీయగాను కనికరింపవుగదే సఖియ

నామనసును తెలిసికొని నాప్రాణము నిలుపు! సత్య
భామా! యలుకలు చాలు ననె వాసుదేవుడు కృష్ణు డపుడు!
- రాధేశ్యామ్ రుద్రావఝల
30.12.2019

ఫొటో కర్టెసీ: శ్రీకృష్ణపాండవీయం సినిమా

హరితకలితము..!

Photo Courtecy - Sandhya Rudravajhala

ఆటవెలది:

చిక్కిశల్యమైన స్నేహితుని కనగ/
మనసు వికల మాయె మగువ లతకు!
హరిత సంపదతని దావిరై పోవగా/
కౌగలించి తనదు కలిమి పంచె!! 

- రాధేశ్యామ్ రుద్రావఝల


28.05.2018 న వ్రాసిన పద్యం ఇది.

వచన కవిత..!!

వచన కవిత:
--------------

వరదలా
జీవనదిలా
పెను గంగలా

రస ప్రవాహంలా
అలుపెరగని జలపాతంలా
ముసురు పట్టి ఆగని వర్షంలా

చిల్లుకుండలా
విరిగిన కొళాయిలా
ఊర్వశి శారద కన్నీటిలా

వడిగా
ఆగకుండగా
ధారాపాతంగా
......
...........
...............

నా 
ముక్కు 
కారిపోతోంది..!!

******

ముత్యాలసరము:

కనుల యెర్రని జీరలొచ్చెను/
బుగ్గలవియె గులాబులాయెను/
పెదవులన్ చిరు వణుకు బుట్టెను/
నాకు జ్వరమొచ్చెన్..!!

***********

కందము:
అయ్యెను ఫీవర్ వైరల్/
కుయ్యనగా ఇంటనున్న కుర్రల మొదలై/
అయ్యకు వచ్చెను మరియిక/
చయ్యన నికనైన మరలు సౌండిక లేకన్..!!
***********

సవరణలతో:
కందము:
అయ్యెను ఫీవర్ వైరల్/
కుయ్యనగా ఇంటనున్న కుర్రల మొదలై/
అయ్యకు వచ్చెను చివరకు/
చయ్యన నికనైన మరలు సౌండది లేకన్..!!

కందము:
అయ్యెను ఫీవర్ వైరల్/
కుయ్యనగా ఇంటనున్న కుర్రల మొదలై/
అయ్యకు వచ్చెను చివరకు/
చయ్యన నికనైన మరలు చప్పుడు లేకన్..!!

సీతాకోకచిలుక

 

సీతాకోకచిలుక

******

ముత్యాలసరము:

1.        రంగుచీరలు కట్టికట్టీ

మొహం మొత్తీ మార్పుకోరీ

నలుపు తెలుపుల కోక నేడే

కట్టుకున్నావా!?

2.        ఎన్ని రంగులు! యెన్ని హంగులు!

ఎంత అందం? ఏమి చందం?

ఎక్కడిది నీకా వయారం,

అంత సుకుమారం!?

3.        పురువుగా నువు పడిన కష్టం

ఒంటిగా నుండేటి వైనం

సుందరిగ ఈ నీ ప్రయాణం

మాటకందేనా?

4.        ఓర్చినమ్మకి తేటనీరట

కష్టముల కెదురీది నేడీ

అందమైనటు వంటి రూపం

సంతరించావా!!??

5.        నీకు నీ ఓపికకు జోహార్

అనుచు దైవం  పూలమధ్యన

తేనెనే త్రాగుచును కడుపును

నింపుకొనమనెనా?

6.        చీదరించిన వెగటు లోకం

నేటి నీ ఈ రూపుజూసీ

అబ్బురం పడిపోతు ఉంటే

నవ్వు రాలేదా..??

7.        ఈసడింపుల చీదరింపుల

మనసులోనవి పెట్టుకొనకా

పువ్వు రంగుల మాకు నవ్వుల

పంచుతున్నావా!

రైలు యాత్ర..!

విజయవాడలో పని చూచుకొని అక్కడి నుంచి విశాఖపట్నానికి తిరిగి బయల్దేరినప్పటి సంగతి ఇది.
సంబల్పూర్ ఎక్స్ ప్రెస్ దొరికితే అది ఎక్కాను, నా పాట్లు అవధరించండి..! 

ఆ.వె.
ట్రైను స్పెషలటంచు రన్నింగునెక్కితి/
గూడు చేర ప్రొద్దు గూక కుండ/
స్పెషలు ట్రైను లేటు జీవిత కాలమై/
యిల్లు చేరు సరికి తెల్లవారె! 

కం.
టీటీ గారికి చెప్పగ/
వాటంగా బెర్తు రాసి పక్కకి పిలిచెన్!
ధాటిగ మామూలిడి, నా
సీటుకు వడివడిగ నడచి చేరితి నంతన్!

తీరా ఎక్కాక లోపల ఏసీ కోచ్ పరిస్థితి ఎలా ఉందంటే:
ఆ.వె.
ఆక్రమించుకొనుచు నన్ని బెర్తులు వారె/
దుప్పటీలు పరచి దొరల వలెను/
విస్తరించుకొనిరి పేకాట రాయళ్ళు/
సేదదీర మనకు సీటు లేదు! 

ఆ.వె.
వేరుశనగ పొట్టు పారబోయు నొకడు,
నీచు తినుచు కంపు నించు నొకడు!
ఉలికి పడగ కాళ్ళ నెలుకలు నర్తించు!
వెతలు రైలు లోన కతలు గావు!

ఆ.వె. 
క్రింది బెర్తులన్ని ముందున్న యాత్రికు
పడకలౌచు హాయి వారి కొసగు!
వారి కాళ్ళ వద్ద కూరుచొన మనసు
రాక లెమ్మనంటి వీక తోడ..!
 
ఆ.వె. 
కాలు బెణికె నేను కదలేననెనొకడు/
పెద్దదాన వీవె సద్దుకొనవొ/
యనుచు నొక్క పడతి యనునయింపగ నేను/
సైడు బెర్తు నెక్కి చస్తి నపుడు!
 

రాత్రి అయ్యాక పడుకుంటే ఇక చూస్కోండి: 
ఆ.వె.
గురక పెట్టి చంపు కుంభకర్ణుడొకడు!
గుక్క పట్టి యేడ్చు గుంట డొకడు!
పక్కవాని బాధ పట్టనే పట్టదు!
రాత్రి పూట రైలు యాత్రికులకు!

16.11.2018