జగదీశుడు రాముడు

చంపకమాల:

తన మృదుభాషణంబు తన ధర్మపరాయణతల్ బలంబుగా/

వనచర సేన తోడ, పెను వారధిఁ గట్టి, పయోబ్ధి దాటి, భీ/

షణ రిపు దానవాగ్రణిని చంపెను తాను మహాద్భుతంబుగా/

నినకుల భూషణుండు జగదీశుడు రాముడు మార్గదర్శియై!

- రాధేశ్యామ్ రుద్రావఝల

ఇడ్లీలపై పద్యాలు:

ఒకసారి ఇడ్లీలు తింటూ వ్రాసిన పద్యాలు :

*********************

హేడ్లీ తో చెప్తున్నాను:

కం.

        హేడ్లీ! వేడిగ సాంబా/

        రిడ్లీలవి రెండు తినగ నింపగు మదికిన్!

        బ్రెడ్లూ బర్గరు పిజ్జా/

        లిడ్లీలకు సాటిరావు యేనాడైనన్!

*********************

కం.

        బూరెలు పులిహోరలు గోం /

        గూరయు పప్పూపులుసును కొబ్బరి చట్నీ/

        గారెలు నేతులతో నిం/

        పారగ నరిటాకున తిన నదురును హేడ్లీ!

*********************

ఆ.వె.

        మల్లె పూలవోలె తెల్లని యిడ్లీలు/

        వెన్న ముద్ద నోట పెట్టినట్టు/

        కరిగిపోయినంత కలుగదే సంప్రీతి!

        యట్టి యిడ్లి కదియె యౌను సాటి!

*********************

తే.గీ.

        వేడి సాంబారు, పచ్చళ్ళ వేడ్క ముంచి/

        తెల్లటిడ్లీలఁ  దినునట్టి దినము దినము!

        నేయి, కారంబు లద్దుచు ప్రీతి మీఱ/

        రవ్వ యిడ్లీల రుచియించు రసన రసన!


- రాధేశ్యామ్ రుద్రావఝల

********************* 

ఈ మధ్యే పరిచయమైన కోరా మిత్రులు శ్రీ చంద్రమోహన్ గారు ఇడ్లీ పై వ్రాసిన పద్యం: 

        కం.

        మల్లెల బోలిన మెత్తని

        తెల్లనివిడ్లీలటంచు తెలియును గానీ

        పుల్లని,వెర్రని, వితరము

        లెల్లను చూపించ మాకు ఇడ్లీలగునే!

జ్ఞానోద్దీపన చేయవే జనని వాక్కాంతా సదా భారతీ!

 

 శార్దూలము.

ఆనందంబగువాఙ్మయాధ్యయము ధ్యేయంబై ప్రవర్తిల్లగా/
నేనుల్లంబున నీపదాంబుజములన్ నెమ్మిన్ దలంతున్ గదే!
ధ్యానింపంగను నీదునామమిక స్వాధ్యాయమ్ము నాకయ్యెడిన్!
జ్ఞానోద్దీపన చేయవే జనని వాక్కాంతా సదా భారతీ!

- రాధేశ్యామ్ రుద్రావఝల
29.01.2021 

హనుమన్ సద్భక్తి నే మ్రొక్కెదన్!

శుభోదయం.

శార్దూలము.
ఉర్వీపుత్రిక జాడ తానెఱిఁగి యయ్యుత్సాహ సంరంభమున్/
గర్వాంధుండగు రాక్షసాగ్రణికి చీకాకున్ ప్రకోపింపగా/
నార్వేరంబు తొలంగ దాశరథికిన్ హర్షంబు చేకూర్చు నా/
దుర్వారోద్యమ బాహు విక్రముని, నస్తోకప్రభారాశినిన్/
సర్వాభీష్ట ఫలప్రదాత హనుమన్ సద్భక్తి నే మ్రొక్కెదన్!

ఆర్వేరము = కలఁత

భూమిజ యైన సీత జాడ తెలిసికొని, ఆ ఉత్సాహముతో, గర్వాంధుడగు రాక్షసరాజైన రావణుని చీకాకు పరచి, రామునికి కలత పోగొట్టి ఆనందమును కలిగించిన ఎదురులేని బాహుబల సంపన్నుడూ, అనల్పమైన కాంతితో వెలుగొందేవాడు, అభీష్టములన్నీ నెరవేర్చేవాడూ అయిన హనుమకు సద్భక్తితో నేను నమస్కరిస్తున్నాను.

- రాధేశ్యామ్ రుద్రావఝల
12.01.2022

పెళ్ళాం అలుక - బాపు కార్టూనుకు పద్యం..!

శార్దూలము:

నేనేదైనను చేసినందు కలకో, నేనేమి చైలేదనో/

నేనైనిన్నొకమాట యంటిననియో, నేనేమి యన్లేదనో/

నేనేదైనను కొన్న బాధ యిదియో, నేనేమి కొన్లేదనో/

యీనాడేమిది మూడు వేస్తివి! యహో! యింకేమి చెయ్ లేననో!

- రాధేశ్యామ్ రుద్రావఝల

11.08.2021

పై పద్యానికి మా గురువుగారు శ్రీ శ్రీరామారావు గారి సవరణ:
నేనేదైనను చేసితో? యలుగగా నేనేమియుం జేయనో?
నేనై నిన్నొకమాటయంటి ననియో? నేనేమి మాటాడనో?
నేనేదైనను కొంటినన్న వగపో? నేనేమి తేలేదనో?
యీనాడేమిది 'మూడు' భంగిమము, నాకేమింకమూడెంగదో?!

కవికంఠ భూషణము లో శివ స్తుతి..!

కవికంఠ భూషణము:

కరుణాంతరంగ, భవ, గాంగజటాధర, హే మహేశ! శం/

కర, ఫాలనేత్ర, శివ, కల్మషకంఠ, సనాతనా! వశం/

కర, వ్యోమకేశ, ధరకార్ముక, జంగమ, స్థాణు, ఝర్ఝరీ!

హర, మమ్ము గాచుమిక నాపద దీర్పవె! పార్వతీపతీ!

- రుద్రావఝల రాధేశ్యామ్

19.05.2021

మనవలెనన్నను మగజాతి మహిలోన...

 
సీసము.
మనవలెనన్నను మగజాతి మహిలోన,
ముఖ్యసూత్రములవి మూడు కలవు!
భార్య పెట్టిన తిండి వంకలు పెట్టక,
మూసుకు తినవలె మూడుపూట్ల!
చేతనుండెడు గిన్నె ఛీకొట్టి విసిరినా,
చూడబోకటువైపు చూపు త్రిప్పి!
యామె గొంతును పెంచి యరచు చున్నను గాని,
వినరాదు తిరిగి మాటనగరాదు!

ఆ.వె.
ఆలి పైని తిరిగి యావేశమందక/
నెమ్మదించ నామె నెమ్మదించు!
అనకు, కనకు, వినకు మన్న సూత్రములివే/
యగును గాక మగల కాత్మ రక్ష!
(లాకుడౌను దినముల గడపగను! )

🙊🙈🙉 - అనకు, కనకు, వినకు

- రాధేశ్యామ్ రుద్రావఝల

అంతరంగం..!

పలుమారులు పిలచిన గానీ

గొంతుక పొడి బారెను కానీ
బదులివ్వని కఠినత్వం నా
కెదురౌతూ ఉంటుందెపుడూ!

ఎందుకు పిలిచానో తెలియదు!
నీకది చేరిందీ తెలియదు!
వస్తావో రావో తెలియదు..!
ఈ మోహ మదేమో తెలియదు..!

                    నా పిలుపది వినిపించదొ..! మరి
                    నీకే వినడానికి చేదో..!
                    వినబడినా నాదరి చేరగ
                    కరగదు నీ మనసది బండో..!

                    ఇది తక్షణ కర్తవ్యమ్మని
                    హృదిపై పెనుబండను మోపీ
                    మోదము కలిగించే పిలుపుని
                    వదిలేద్దా మనుకుంటుంటా!

                    నిన్నే విసిగించగ రాదని
                    పిలువగ లేనంతటి దూరము
                    పోతానని శపథము చేయగ
                    ఈ జీవితమింతేలే నని

                    అనుకుంటూ ఉండంగానే
                    భానుడు తనదోవన పోగా
                    చంద్రుడు ఉదయించెను; కాంతుల
                    వెదజల్లెను చీకటి రాత్రుల!

                    వస్తూనే చంద్రుడు నాతో
                    పదపద యిక చాల్లే అంటూ
                    యెదలోతుల భావాశ్రువులను
                    ఇకదాచేయ్ అంటాడెపుడూ..!

                    తెలియని యొక వేదనయేదో
                    గుండెను పిండేస్తూ ఉంటే
                    అది కనబడకుండా దాచే
                    ముసుగొక్కటి యిస్తావా..!?

                    చీకటినే మించిన చిక్కటి
                    ముసుగేదీ లోకంలో..!? క
                    న్నీటిని దాచేసే నేస్తం -
                    వర్షం రాదేం..!? ఇది గ్రీష్మం..!!

                    అగాథమౌ భావాంబుధిలో
                    నే కూరుకుపోగా, చీకటి
                    తన చెంగున నను దాచెను నా
                    ఒంటికి తన రంగే పూసెను..!

                    నీ తలపుల నిదురే పట్టక
                    యెరుపెక్కెన కన్నుల సాక్షిగ
                    సూర్యుడు ఉదయించెను తూర్పున..!
                    కూయని నే కూసితి చప్పున..!!

                    - రాధేశ్యామ్ రుద్రావఝల
          

https://youtube.com/shorts/T9F8Sm8zMpQ?si=yw9GBaT0Gmnl60pb 

కరోనా సెకెండ్ వేవ్..!

ఉత్పలమాల.

ఒక్కడు మాస్కుఁ బెట్టడు; మరొక్కడుఁ బెట్టును గడ్డమందు; నిం/

కొక్కడు మీదకొచ్చు; మరి యొక్కడు తుమ్మును నడ్డులేక; యా/

తక్కిన వారతీతమని దల్చి తిరుంగ స్వతంత్రులౌచు, చే/

జిక్కగ నీ కరోన కిక చిత్రమదేమి సెకెండు వేవునన్!

- రాధేశ్యామ్ రుద్రావఝల