మగబుద్ధికి మార్పురాక మనుగడ యెట్లో! - 1

కందము.
రగిలెను శ్రీమతి పతిపై/
వగచుచు "గుర్తేది మీకు పనిలో పడ మా/
యగచాట్లేవో" యనె! నిల
మగబుద్ధికి మార్పురాక మనుగడయెట్లో!?

ఇంకొకటి:-

కందము:
పగవాడు కాకపోయిన
వగ పాలౌనటుల జేయు వనితల ధరలో
తెగడుచు సాధింపగ నీ
మగబుద్ధికి మార్పురాక మనుగడ యెట్లో!

- రాధేశ్యామ్ రుద్రావఝల
(15.07.2018)

ఆకాశవాణి విశాఖపట్నం వారిచ్చిన సమస్యకు నాపూరణ ఇది..!

మగబుద్ధికి మార్పురాక మనుగడ యెట్లో! -2

కందము.

ప్రక్కనె యుండగ తాళము/

లెక్కడ పోయినవని తెగ యెగిరెగిరి పడే/

తిక్కల పెనిమిటితో నెక/

సెక్కము లాడుట యదొక్క శ్రీమతికె తగున్! 😀

జగమంతయు వెదకితి మరి/ 

యగుపడ లేదంచు, నాలి నడుగుట పతిదే/

వుగ నా హక్కని తలచెడు/

మగబుద్ధికి మార్పురాక మనుగడ యెట్లో! 🤷🏻‍♀️

- రాధేశ్యామ్ రుద్రావఝల

15.04.2021

వేసవిలో శివుడి సదుపాయాలు..!

చంపకమాల.
చలువకు శీత శైలమును, చంద్రుడు, గంగయు నెత్తినుండ, నీ/
వలువలు దిక్కులై గళముఁ బయ్యరమేపరి యుప్ఫనంగ నీ/
వలది విబూది దేహమున హాయిగ నాడెద వేమి గొప్ప!? నీ/
విలనొక వేసవిన్ గడుపవే తెలియున్ పస పార్వతీపతీ!

శివుణ్ణి ఉద్దేశించి వేసవిలో మనపాట్లు, ఆయనకి ఉన్న సదుపాయాల గురించి చెప్తూ వ్యాజస్తుతిలో వ్రాసిన పద్యం ఇది.

ఓ పార్వతీ పతీ, నీకు చల్లదనాన్ని కలిగించడానికి చుట్టూ మంచుకొండలు, నెత్తిమీద చంద్రుడు, గంగ ఉన్నాయి, నీవు దిగంబరుడవు (దిక్కులే అంబరములు అంటే వలువలు, వస్తాలు గాకలిగినవాడవు, కంఠానికి చుట్టి ఉండేది పయ్యరమేపరి అంటే (పయ్యర - గాలి, మేపరి - భక్షించేది) పాము. (మనం ఉక్కపోస్తే ఉఫ్ అని మెడ మీద దగ్గర ఊదుకుంటాం కదా, అలాగ శివుడికి ఎప్పుడూ అలా ఊదడానికి బుసలుకొట్టే పాములు ఉన్నాయి.) ఇవన్నీ ఉండగా పౌడర్ రాసుకున్నట్టు విబూది ఒళ్ళంతా పట్టించుకొని హాయిగా ఉంటావు. మా భూమిమీద ఒక వేసవి గడిపిచూడవయ్యా, అప్పుడు తెలుస్తుంది నీ పస ఎంతో.. అని భావం.

 

- రాధేశ్యామ్ రుద్రావఝల
04.04.2021 

అందం తెచ్చిన తంటా..!

ఆ.వె.
అరువదేండ్ల ముసలి యముని గని కలను/
నాయువెంత మిగిలె ననుచు నడిగె/
ముప్పదేండ్లపైని మూడుమాసములని/
యా యముండు పలికె నాదరమున!

ఆ.వె.
సంతసించి నారి చెంతనుగల వైద్య/
శాలకు చని ఖర్చు చాల చేసి/
చక్కదనము తిరిగి చిక్కునట్లు చికిత్స/
నంది పాతరూపు పొందె ముదము..!

ఆ.వె.
వైద్యశాల నుండి వచ్చిన వనితను/
నకట! గ్రుద్దు కొనియె నాంబులెన్సు!
విడిచె ప్రాణ మచటె విల విలలాడుచు/
తరుణి కాయె యముని దర్శనమ్ము!

ఆ.వె.
ఏల జేసినావొ యింతటి ఘోరము?
ఆయువెట్లు దీరె ననుచు నడుగు/
పడతి జూచి యముడు బదులిచ్చె "గుర్తింప/
కుంటినమ్మ నిన్ను కోమలాంగి!"

_(ఆంగ్లములో వచ్చిన ఒక వాట్సాప్ జోకుకి పద్యానుసరణ.)_
- రాధేశ్యామ్ రుద్రావఝల
(01.08.2019) 🙏🙏🙏

పంచచామర వృత్తము లో పద్యములు

ఈ రోజు పంచచామర వృత్త పద్యములు ప్రయత్నించానండి.. 🙏🙏🙏

లక్షణము:

1. 4 పాదములు ఉండును.
2. ప్రాస నియమం కలదు
3. ప్రతి పాదమునందు 10 వ అక్షరము యతి స్థానము
4. ప్రతి పాదమునందు జ , ర , జ , ర , జ , గ గణములుండును.

పంచచామరములు:

ప్రరూఢమౌచు నిష్ఠతో ప్రభాత కాలమందునన్/

పరాత్పరా! త్రిపత్ర పత్రి భక్తి పూజ సేసి, నిన్/

హరోంహరా శివా యనంగ హార్దికమ్ము, వేగమే/

పరాన చేర్చి మోక్షమిచ్చు స్వామి! నీకు మ్రొక్కెదన్!

త్రివేణి సంగమస్థలాన తీర్థమాడ బోయినన్/

భవాబ్ధి దాట శక్యమే? భవా! శివా! కృపాకటా/

క్షవీక్షణమ్ము లేక నీది! చంద్ర శేఖరా! పరీ/

క్షవెట్టబోకుమయ్య మాకు, శంకరా! సదాశివా!

శివా! యనన్య శక్తి సాంద్ర! చిద్విలాస! చిన్మయా!

భవా! సచేతనా! విరాగి! ఫాలనేత్ర! శంకరా! 

అవస్థిరా! వశంకరా! నిరామయా!  మహేశ్వరా! 

నివాసముండు నా మనంబు నిత్యమై! పరంతపా!

- రాధేశ్యామ్ రుద్రావఝల

02.04.2021

పెళ్ళాం పై పద్యం (పెళ్ళయిన కొత్తలో & పెళ్ళయిన పదహారేళ్ళ తరువాత..!)

 

ఈ జంట పద్యాలను అవధరించండి:

పెళ్ళయిన కొత్తలో/ అవకముందు:

కం.
చూపులుగావవి..! హా..! విరి/

తూపులు గద నన్ను జూచి దోచెను మనసున్/
తాపము హెచ్చెను చిత్త ప్ర/
లాపము కల్గెను ప్రియసఖి లావణ్యము తోన్!

****

మరో సరదా పద్యము: వారఫలాలు

 మరో సరదా పద్యము:

ఉత్పలమాల:
తీయని వార్త విందువని దృష్టికి వారఫలంబు సోకగన్/
హాయనిపించి, భర్త కడు నచ్చెరువందగ, శ్రీమతిన్ త్వరన్/
సాయము కోరి రమ్మనగ, జాగును సేయక పుట్టినింటికిన్/
పోయెద నన్న నామె కనుమోదము దెల్పెను సంతసంబునన్!

(ఇది కూడా కల్పనే సుమండీ..)
😄😄😄

వ్యాజస్తుతి..!

శార్దూలము.

నీ సొమ్మేమది పోవునో, భవహరా! నీకెంత యాటాయెనో!
యే సార్థక్యము కల్గి గొప్పదగు పేరే దాల్చెదో! గొంకవో!
యీ సంసార పయోధి ముంచక ప్రభో! యెట్లైన దాటింపవో!
యో సామీ! తమ పాదముల్ గొలువ లేదో !?  తండ్రి! కాపాడుమా!

గోంగూర పచ్చడి..!

😁😁 గోంగూర పచ్చడి 😁😁

సీసము.

కూర్మి కలిగి లేత గోంగూర కాడల/

యాకులన్నిటి రెల్చి యాదరమున/

మంచినీట కడిగి మంచి బట్ట దుడిచి/

పొయ్యి సన్నసెగను మూకుడుంచి/

యందు చారెడు నూనె నాకుల వేయించి/

యిగురునంతవరకు మిగుల కలిపి/

దానిని రోటిలో ధాటిగా రుబ్బుచు/

నప్పుడు సరిపడు నుప్పు కలిపి/

పార్వతీదేవి అలుక

కం.

అంగము సగమిచ్చితివని/
పొంగెనుతన సంతసమది భువనము నిండన్/
గంగను తలపై నుంచుకొ/
నంగా నీపై కినుకను నగసుత యలిగెన్/